ઉત્તર કોરિયાએ પ્રતિબંધોને નકારી કાઢ્યા, નવા પરમાણુ પરીક્ષણની તૈયારી અંતિમ તબક્કામાં

ઉત્તર કોરિયાના કેટલાક જૂથો સાયબર હુમલા કરવામાં રોકાયેલા છે. તેમાં કથિત રીતે સાયબર ક્રાઈમ સંબંધિત જૂથ લાઝારસનો પણ સમાવેશ થાય છે. આ જૂથોએ સાયબર હુમલા દ્વારા ક્રિપ્ટો કરન્સીમાંથી લાખો ડોલરની ચોરી કરી છે. ઈન્ડો-પેસિફિક ક્ષેત્રમાં વધી રહેલા તણાવ વચ્ચે ઉત્તર કોરિયાએ પણ ઉશ્કેરણીજનક કાર્યવાહી ચાલુ રાખી છે. સંયુક્ત રાષ્ટ્રના એક રિપોર્ટમાં આ દાવો કરવામાં આવ્યો છે. આ રિપોર્ટ અનુસાર, ઉત્તર કોરિયાએ હાલમાં જ એક વિસ્ફોટક ઉપકરણનું પરીક્ષણ કર્યું છે. તેની સાથે જ તેણે તેની ન્યુક્લિયર સાઇટ પુંગગી-રી પાસે નવી ટનલ બનાવવાનું શરૂ કરી દીધું છે.સંયુક્ત રાષ્ટ્રનો આ અહેવાલ હજુ પ્રકાશિત થયો નથી. પરંતુ એક ખાનગી વેબસાઇટના રિપોર્ટના તારણો પ્રકાશિત કર્યા છે. વેબસાઈટે જણાવ્યું છે કે તેણે આ રિપોર્ટનો અભ્યાસ કર્યો છે. આ અહેવાલો આ વર્ષના પ્રથમ સાત મહિનાના છે. તે ઉત્તર કોરિયાએ પ્રતિબંધોને બેઅસર કરવા માટે અપનાવેલી પદ્ધતિઓની રૂપરેખા દર્શાવે છે. આ વેબસાઈટના જણાવ્યા અનુસાર આ રિપોર્ટ સંયુક્ત રાષ્ટ્ર સુરક્ષા પરિષદને સોંપવામાં આવ્યો છે. ત્યાં કાઉન્સિલના કાયમી સભ્યો વચ્ચે તેની ચર્ચા થશે. જે બાદ તેને સાર્વજનિક કરવામાં આવશે. બુધવારે સુરક્ષા પરિષદની ઉત્તર કોરિયા પ્રતિબંધ સમિતિને રિપોર્ટ સોંપવામાં આવ્યો હતો.રિપોર્ટમાં આરોપ લગાવવામાં આવ્યો છે કે ઉત્તર કોરિયા હજુ પણ તેના દેશમાં મોટા પ્રમાણમાં પેટ્રોલિયમ ઉત્પાદનોની દાણચોરી કરી રહ્યું છે. સંયુક્ત રાષ્ટ્ર સુરક્ષા પરિષદે તેના પ્રતિબંધોના ભાગરૂપે ઉત્તર કોરિયા પર વર્ષે 50 લાખ બેરલ પેટ્રોલિયમની આયાત કરવાની મર્યાદા લાદી છે. સ્થાયી સુરક્ષા પરિષદના સભ્ય દેશના એક અધિકારીએ આરોપ લગાવ્યો છે કે ઉત્તર કોરિયાએ આ વર્ષે અત્યાર સુધીમાં જેટલી આયાત કરી છે તેમાંથી અડધા મિલિયન બેરલથી વધુ પેટ્રોલિયમ ઉત્તર કોરિયામાં લાવવામાં આવ્યું છે